Herrenmatt-Hof

Augemeini Gschäftsbedingige (AGB) Herrenmatthof

1 Gäutigsberiich

Es giut nur füre Onlineshop und betrifft Gschäftsbedingig zum Zytpunkt vom bsteuä übere Webshop vom Herrematthof. Gschäftsbeziehig wäri denn zwüsche üs em Herrematthof und Öich aus Chund.

2 Vertraglichkeit

Darstellig und Beschriibig vo de Produkt im Online-Shop isch ke rächtlech verbindliche Atrag, sondern steut numme e unverbindliche Online Katalog dar. We Dir Produkt im Warechörbli heit, de giut das nid aus verbindlechi Bstellig. Sobaud Dir Bstellig abgschickt heit, chömmet Dir es Mail vo üs über. Das seit nur, dass mir Öii Bstellig übercho hei. Diä Anahm erfougt unger Vorbehaut vor Verfüegbarkeit dr bsteute Produkt. We vorübergehend es Produkt nid cha glieferet wärde, mäude mir üs bi öich. D'Verfüegbarkeit im Onlineshop dient numme aus Information und nid aus Lieferbestätigung. z'Gwicht vo de Produkt variert sehr und därum wird dr Priis ersch bim abholä oder bir lieferig gnau abgmacht.

3 Lieferig und Versandchöschtä

Mir mache zäme e Termin ab mit Vorbehaut vor höchere Gwaut oder Dritt-Iflüss. Wiitgehendi Asprüch, insbesondere vo Schadeersatz bestöh nid.

Dir chöit vor ganze Wäut häre zu üs cho ichoufe, es muess eifach Bar oder via Twint zaut wärde. Mir liefere nur ca. 20 Kilometer vo üsem Heimetli ewäg (Mindestbstellig vo 150 Franke).

4 Guetschiin

Es gäute nur üsi Guetschiine. Bim ne Räschtguethabe wird dr Räschtbetrag wieder ufe Guetschiin gschriibä.

5 d'Haftig

Mir hafte für üses eigete Verschoude.

6 Zrugg gä

We Dir mau öppis wetet zrugg gä, de müesst Dir aber e triftige Grund dr zue ha. Säget üs dr Grund und gät das Produkt üs zrügg. Nid eifach häre lege, sondern diräkt i üsi Häng.

7 Eigentumsvorbehaut

d'Produkt ghöre üs, bis Dir's zaut heit.

8 Haftigsbeschränkig

Schadensasprüch gäge Herrematthof si usgschlosse, sowiit nid es vorsätzlechs oder grobfahrlässigs Handle vorliegt. Für Fougeschäde lehne mir jedi Haftig ab.

Schlussbestimmige

Es gäute Bestimmige und Gsetz vor Schwiiz, gnauer vom schwiizerische Obligationerächt. Dr Grichtstand isch in Bärn. Mir behaute üs vor, die augemeine Gschäftsbedingige jederzyt zändere. d'Verbindlichi Fassig vo de AGBs isch immer uf üsere Hompeitsch.

Riedbach, Ouguscht 2021